李八方online｜林鄭上京見習近平前再示忠 自稱已向外媒澄清涉國安法誤導謬論
蘋果日報 2020/12/10 16:06
國安法林鄭月娥
一場武漢肺炎，大家睇到香港特首林鄭月娥同一海之隔嘅澳門特首賀一誠，喺抗疫同辦事能力上嘅分別。唔知係咪想借示忠掩飾抗疫不力，定係慣常病態地自我感覺良好？林鄭喺下周上京述職見佢老闆習近平前，喺Facebook話自己過去幾日接受咗《華爾街日報》同《中國日報》訪問，希望多啲向以英語溝通嘅國際社會解說香港實施「港版國安法」後嘅情況，「特別是澄清一些誤導和謬論」。
其實過去一年邊個誤導緊香港人？邊個頻頻發表謬論？只要睇下一眾官員嘅民望，相信心中有數。
特首林鄭月娥於Facebook表示，自己過去幾日接受咗《華爾街日報》同《中國日報》訪問，希望多啲向以英語溝通嘅國際社會解說香港實施港版國安法後嘅情況，「特別是澄清一些誤導和謬論」。（林鄭月娥Facebook圖片）
林鄭指國安法實施後「市民可重新依法享有自由和人權」
林鄭喺呢篇唔知寫畀邊個睇嘅文中，不點名反駁美國傳統基金會，佢話：「最近某智庫說有了《香港國安法》，香港的國際金融中心地位岌岌可危。我要反問的是：世界上哪一個國際金融中心的城市，沒有受該國形形色色的國安法律所保障呢？」
林鄭又問：「若一個地方好像香港去年下半年，時刻出現暴力事件、汽油彈橫飛、機場被圍堵、公共交通受破壞，它可以繼績吸引海外投資者嗎？市民可以安居樂業嗎？」
特首林鄭月娥於Facebook發文，不點名反駁美國傳統基金會。（林鄭月娥Facebook圖片）
佢引述中國人有句話叫「事實勝於雄辯」，聲稱國安法實施後，過去5個多月嘅香港，「市民可以重新依法享有自由和人權」。
講到尾，千錯萬錯都係爭取五大訴求嘅香港人；至於所謂「巿民可以重新依法享有自由同人權」，大家只要睇下過去呢幾個月，每日有幾多民主派遭濫捕、監禁同被迫流亡，真係「事實勝於雄辯」。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！