平時cool爆嘅古天樂，喺陳木勝執導嘅新片《喵星人》入面，嚟個大變身，扮《西遊記》入面嘅蜘蛛精同美人魚，畀大家難得一見佢嘅扮嘢本色。古仔今次為新片犧牲色相，捨棄佢嘅男神形象，換咗個鬈毛頭，兼係從影以嚟第一次男扮女裝登場，化身蜘蛛精，想扭六壬迷惑敵人，妖艷程度唔輸蝕畀女人，甚至半裸上陣，着上特製嘅美人魚女裝變身美人魚，造型搞笑，連導演都急唔住笑話前所未見，簡直喜劇之王大爆發。古仔就話明係豁出去：「既然拍喜劇，就要身心全投入，咁至可以令觀眾睇得過癮。」

戲中變身蜘蛛精嘅古仔，為咗擊退犀犀利飾演嘅孫悟空，向住對方扭動蛇腰兼嘟嘴獻吻，散發濃濃騷味，搞到喺旁邊嘅導演不停忍笑 古仔讚導演、服裝同美術部門至係勞苦功高：「事前導演同美術花咗唔少時間研究我嘅扮相，設計服裝要花好多功夫。」

扮完姣味十足嘅蜘蛛精之後，導演再安排古仔變身扮美人魚，半裸上陣騷古銅色肌膚，加埋一頭鮮綠色短曲髮，成功搶鏡，而古仔竟然話拍攝扮美人魚嗰場戲好爽：「嗰日好熱，啱好喺泳池邊拍，半裸上身對我嚟講，係拍呢部戲咁最爽嘅一次，又可以乘機曬下太陽。」不過戲中嘅犀犀利就相反，要冒住隨時中暑嘅危機，笠住個貓道具上陣，所以現場要有醫生駐守。