當年今日
關於我們

【列強爭地系列一】鄭家純榮登「首席梁粉」 陳啟宗無份!

蘋果日報 2014/10/16 06:00

梁粉

近期CY俾場「雨傘革命」搞到頭都大埋,不過喺全宇宙焦點去哂佔中之際,早兩日「純官」鄭家純旗下嘅新世界(017),以「棄商場、要住宅」的方案,成為巨無霸項目大圍站住宅部份的主人,手握2,900伙新供應之餘,出面仲有傳新世界同港鐵(066)分紅比例高過三成,證明到純官對香港磚頭嘅後市夠哂信心,而且唔大件都唔吼,食親都大大件。

事實上,CY至今上任兩年幾,同一眾大孖沙嘅關係親疏越來越浮面,當中要數撐CY撐得最出面嘅,似乎係恒隆(101)董事長陳啟宗。不過,話就話佢係「首席梁粉」,點知早排先俾人「篤爆」安排恒隆員工離開中環總部,去後勤寫字樓返工。把口撐CY,點知身體卻好誠實咁,避開佔中,擺明唔信CY搞得掂呢場雨傘革命。

所以呢,陳啟宗仲係咪「首席梁粉」,筆者都開始唔多唔少有啲質疑,反而早兩日「純官」鄭家純旗下嘅新世界,以黑馬姿態,掃低長實(001)、新地(016)等區內地主,搶贏大圍站,但只係齋要2,900伙住宅,但成六十幾萬呎樓面,足足成個觀塘apm咁大嘅商場,成嚿肥豬肉俾返港鐵自己搞。但變相新世界只係要揹起28億嘅補地價金額,每呎樓面地價低至千四蚊以下。

不過,聽聞新世界今次建議俾港鐵的分紅比例約30%,出手比其他發展商闊綽,而且咁大個項目,將成嚿商場肥豬肉俾返港鐵,好難唔令人想像到係撐緊港鐵大股東,即係特區政府。

更甚者,新世界近年出手投地都幾進取,撐政府撐到出哂面,仲要食親都大大件,要數撐得出面的一次,係CY喺12年7月上任後,同年9月投得市建局旺角波鞋街項目,之後喺舊年1月,再伙拍內房龍頭萬科買入西鐵荃灣西站(六區)。夾夾埋埋,過去兩年幾,新世界已吸納近300萬方呎土儲,合共成超過4,000個單位。所以話,要數地產界嘅「首席梁粉」,唔應該係陳啟宗,而係同台灣雞排妹同名嘅鄭家純。

記者︰黃嘉銘