《鬼武者2》行貨3月到港
蘋果日報 2002/01/12 00:00
根據最新資料公布，《鬼武者2》將鐵定於3月7日推出，而且香港代理方面，亦已經開始向各商舖收單，不過就未有公布定價。𠵱家啲日圓跌到咁低，唔知今次隻《鬼武者2》會唔會因此而減價呢？
上個星期隻《GTConcept》好多地方都賣到斷晒貨，不過好彩，喺嚟緊嘅星期一會有大貨返，否則又要俾人炒起啦！另外，玩《GT》必買嘅GTFORCE軚盤，最近亦有行貨返，早排俾人炒到貴一貴，𠵱家$650就有交易，而且重係行220V香港電壓，抵玩！
上個星期隻《GTConcept》好多地方都賣到斷晒貨，不過好彩，喺嚟緊嘅星期一會有大貨返，否則又要俾人炒起啦！另外，玩《GT》必買嘅GTFORCE軚盤，最近亦有行貨返，早排俾人炒到貴一貴，𠵱家$650就有交易，而且重係行220V香港電壓，抵玩！
PS2今個星期亦公布咗好多大作嘅發售日期，而且大部分都係圍繞住三月嘅復活節檔期。好似《WildArms2》就會喺3月18日，《鐵拳4》就會喺3月20日；至於《機械人大戰IMPACT》就定咗3月28日，而SQUARESOFT同Disney合作嘅《KINGDOMHEARTS》都會喺3月28日同日發售。以上所講嘅，都係一啲注目度甚高嘅遊戲，如果再加埋其他新作，單係三月份就有成6至7隻新Game推出。
最近有傳聞話美版嘅XBOX主機，可以玩到日版嘅XBOX遊戲，雖然呢段料未得到證實，不過網上流傳就講到似層層，而且喺日本嗰邊，重有人話用Sample試過真係玩到！不過本鐵人一向以眼見為真，想知真定假，等到2月22日正式到貨試過先做定奪啦！
另外，GBA機價方面，中國製嘅GBA機價今個星期跌到落$500有找，而日本製就企硬喺$530左右。
文：打機鐵人