王愛倫、曹敏莉同胡渭康噚晚喺灣仔出席慈善晚宴，現場展示多幅唐卡作拍賣籌款。王愛倫同曹敏莉結伴到場，王愛倫話：「呢位寧波車，之前捐過唐卡畀慧妍雅集籌款，所以我哋特登嚟支持佢。我屋企都有幾張唐卡，當然冇現場呢啲咁名貴，不過都係以古代顏料繪製。O依家好多唐卡用普通顏料畫，保存期冇咁耐。」

佢仲話自己好想學畫唐卡，但因為太忙冇時間。曹敏莉即表示因為明年5月，慧妍雅集會舉行晚宴，O依家努力同贊助商傾緊。

嚟緊聖誕，曹敏莉透露會帶3個小朋友去澳洲：「暑假嗰陣去過美國，嗰陣仲有時差，所以今次應該都冇問題，我老公又幫到手。」佢笑指7歲嘅大女同5歲嘅二仔搭飛機嗰陣，會自己玩、自己傾偈，所以好放心淨係湊住2歲嘅細仔就得啦！問曹敏莉會唔會再生？身旁嘅王愛倫即笑話：「我哋唔畀佢生呀！成日都要湊BB，冇時間開會。」曹敏莉坦言平日要照顧小朋友功課好忙：「今日都係同佢哋『請假』先可以嚟。」

另外，胡渭康亦係唐卡嘅愛好者，佢話除咗宗教原因，唐卡嘅藝術程度好高：「好多僧人一路畫一路冥想、念經，嗰份精神同工藝，好值得欣賞。」佢仲透露屋企有幅由純金畫嘅唐卡，非常有收藏價值。

胡渭康透露新年會喺紐約做倒數騷：「好開心呀！係當地一個電台邀請我，我都係第一次去count down。做完活動，仲會去羅省探家姐，之後就去美加、日本登台。我售後生，唔會休息，要密密做賺啲退休金。」

精選娛聞，喺晒《娛果》
http://fb.com/appledailyent