樂壇天后麥當娜（Madonna）近日一批私人物品遭放上網站拍賣，包括內褲、私人照同埋私人書信等，盡揭娜姐私隱，佢入稟成功阻止部份物品作公開拍賣。

紐約最高法院周二頒布臨時禁制令，阻止拍賣網Gotta Have It於周三起拍賣部份娜姐嘅物品，據指拍賣網會拍賣約120樣娜姐物品，當中共有22樣被律師形容為「具私隱同令人尷尬」嘅物品已被阻止拍賣。從傳媒取得嘅法庭文件顯示，娜姐話唔知道呢啲物品已經唔再屬於自己，佢同時指遭友人Darlene Lutz出賣。

呢批拍賣品最受注目係娜姐於90年代寫嘅一封書信，入面提到娜姐話已故天后雲妮侯斯頓（Whitney Houston）同莎朗史東（Sharon Stone）「相當平庸」，估計呢封信佢係寫俾當時男友John Enos。而另一封由已故饒舌歌手Tupac Shakur喺獄中寫俾娜姐嘅分手信，內文提到佢因娜姐嘅白人身份，因而提出分手。