蔡一傑聖誕派對老婆爭寵 大婆伍詠薇喊住感激包容
蘋果日報 2020/12/11 14:34
蔡一傑伍詠薇阮小儀蝦頭周汶錡
蔡一傑與老婆相聚。（網上圖片）
蔡一傑日前邀請一班「老婆」趁在YouTube個人頻道《傑少煮意》，慶祝開channel一周年，籌備新一集《傑少煮意聖誕Party》，當中有傑仔稱呼「女神」的周汶錡、互稱「愛人」的伍詠薇、草蜢歌迷會成員阮小儀及早前拍MV《夜半超人》成為好友的「蝦頭」楊詩敏，事前細心的傑仔更買禮物贈給4位老友。
伍姑娘乳貼跌傑仔心口
4位女藝人在節目中稱呼傑仔做「皇上」互相爭寵，伍姑娘坐正做正宮、阮小儀排第二、周汶錡和蝦頭分別排第三及四， 節目中有遊戲環節，答中問題得到傑仔預早挑選的禮物，立即變四房之爭，自稱「大婆」的伍姑娘呷醋傑仔把心頭好送給其他房的女人，最後四太蝦頭得到最多禮物，傑仔笑言點燈帶回宮。當大婆伍姑娘用軟尺量度傑仔38吋胸肌乘機抽水擁抱，更自爆：「當年我哋拍MV，我乳貼跌落你個胸。」
四人嘻嘻哈哈玩樂一個晚上，最後5人深情對白，互訴多年相識經歷，小儀得到兒時偶像的關心，感覺奇妙：「冇諗過因為職業同偶像咁親近，仲可以做朋友，原來蔡一傑係會喺我背後睇我好多嘢 ，佢好關心我，做過乜工作，有乜錯或者啱，佢會認真話我知，感情上幾次見蔡一傑有關心我，佢會喺我玩嘅人當中，如果有啲壞人佢會提醒我，如大哥哥照顧我。」
伍姑娘更聲淚俱下感謝老友多年來包容：「你係好人，亦都好寸，但你抵寸，因為你得。同佢同台做嘢我都驚，但我多謝你用一個方法令拍檔唔驚。我係好難服侍嘅女人，唔叻唱歌，舊年我聲帶生繭，佢夠膽請我去加拿大做佢第一次個人演唱會嘉賓，佢可以揀另一個好唱得嘅朋友，佢對我有信心。」周汶錡坦言傑仔鍾意挑釁別人，性格唯美和固執，但他不介意別人抨擊。
蔡一傑老婆晒冷慶祝聖誕，左擁右抱圈中4位好友，（網上圖片）
周汶錡、伍詠薇、阮小儀和楊詩敏，齊齊賀《傑少煮意》開台一周年。（網上圖片）
伍姑娘感激落淚，多謝蔡一傑給自己信心和包容，（網上圖片）
蔡一傑對朋友認真，他很珍惜老友相聚。（網上圖片）
蔡一傑和伍姑娘認識多年，經常互訴心事，（網上圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！