【大頭蝦】林嘉欣手袋+熱水壺狂扑頭 黃秋生死忍劇痛唔反抗
林嘉欣黃秋生袁劍偉
導演袁劍偉與太太林嘉欣夫妻檔合作的電影《死因無可疑》今日在尖沙嘴謝票,有份演出的陳家樂及湯怡亦有到場。袁劍偉與林嘉欣齊齊受訪,他表示與太太合作不算太大壓力,又大讚太太演出好精采:「佢做咗好多功課、付出好多。」問他為何要太太扮醜演出?袁劍偉笑謂:「佢鍾意畀我糟質。」身旁的林嘉欣即甜笑說:「夠啦,夠啦,飽啦,入正題啦。其實演員鍾意做到啲刺激到自己想像世界嘅嘢,我都有問佢點解要搵我演,佢話想打破我美好嘅太太、媽媽形象,覺得咁樣會令我成長。其實我都緊張,因為要做好多功課,我對手係(黃)秋生,我都怕被佢嫌棄。」
袁劍偉指太太及秋生演得太好:「我睇住個mon,有時都唔捨得嗌cut。」林嘉欣自爆有場打秋生的戲,因為大頭蝦令秋生被真打:「拍嗰陣係冬天,我唔記得咗自己放咗個熱水壺入袋,我就拎住個袋係咁打落秋生個額頭,佢未cut我就一直打。拍完先醒起個水壺,我同秋生講10,000個對唔住,見到佢匿埋一邊捽咗好耐,真係好慘。」問兩公婆可會再合作?兩人表示暫時不會,袁劍偉指現時籌備以男人主導的電影:「未放到太太落去,或者下次我畀佢糟質返,佢做導演我做演員啦。」
陳家樂表示導演對他很關照:「嘉欣、秋生嗰啲1、2個take就得,我就NG十幾個take都有,因為佢想我突破以前個框框。」他與湯怡於戲中有激烈床上戲,湯怡坦言兩人份屬老友甚有默契,但踢爆他不喜歡完成拍攝後做賽後檢討,陳家樂說:「平時唔熟嗰時,拍完就拜拜,今次佢係咁問我覺得點,仲話我對鬚拮到佢好痛,我聽完個心都揦住,好似我表現好差咁。」他謂女生多數不喜歡男士有鬚根,記者笑問是否女友連詩雅不喜歡?陳家樂即尷尬說:「冇冇冇,一般女仔啫,冇指定。你問啲我識答嘅嘢啦,其他嘢我唔知。」
-----------------------------
打國際線 《蘋果》英文版免費試睇
按此了解更多 英文版已登錄新版《蘋果》App
按此下載/更新 (左起)陳家樂、湯怡、林嘉欣及導演袁劍偉,今日到戲院進行謝票。