仲記唔記得2014巴西世界盃嗰陣因為個樣似香港影視明星吳鎮宇而被稱為「墨西哥Sam哥」嘅門將奧祖亞？佢喺世盃之後加盟西甲馬拉加，今季就外借咗去CF格蘭納達，不過球隊已經肯定要降班，而喺星期六作客奧沙辛拿嘅尾二一輪聯賽，球隊以1:2輸波畀對方過咗頭而跌落榜尾之餘，今季喺西甲37場聯賽踢足咁多分鐘嘅「Sam哥」失波亦累積到80球，打破咗西甲嘅單季失球紀錄。舊紀錄係薩拉曼卡門將Aizpurua喺1995/96球季出賽40場聯賽所失嘅79球，而當年嘅西甲有22隊，每隊進行42場比賽。