當年今日
關於我們

【拒入樂壇】關楚耀胞妹關美薇做網紅 自白收入好過教書但唔長遠

蘋果日報 2020/04/02 06:00

關楚耀網紅KOL關美薇關維麟

關美薇(Nat)是近年在香港社交平台冒起的時尚界別的KOL/Influencer,俗稱「網紅」,她本身來自音樂世家,父親關維麟是80年代香港著名唱片監製、前寶麗金亞太區總裁,資深音樂人泰迪羅賓是她的伯父,而關楚耀是她的哥哥,關家一門三傑。Nat前年曾在胞兄的演唱會獻唱做嘉賓,純粹是玩票性質,正職是在兒童學習中心做英文老師。
Nat於加拿大出生,高中時回流香港,在香港大學心理學碩士畢業,屬高學歷一族,她畢業後第一份工在時裝品牌做採購的工作,之後就轉行做英文老師,做小朋友眼中的Miss Nat,一做已做了6、7年。日前她接受《蘋果》專訪,被問到為何會成為slash世代,兼職去做網紅,她表示:「我喺learning centre度教,主要教小朋友,grade 1至grade 6,做咗6、7年,畢業後最長一份工,不過教教吓有啲多餘時間,慢慢就有人問我出唔出吓啲event,出吓出吓就有人開始稱呼我係KOL、influencer。」
網紅往往給人的感覺是見盡美事,貼相與網民分享,就完成工作,在Nat的IG平台,可以看到她與不少時裝、珠寶及美容品牌的合作外,亦有她的私人生活分享,如早前她就分享了與她的金融才俊未婚夫袁煒熙在巴黎影的婚紗相,並非單一商業化的內容,亦有為愛犬開賬戶。對於外界對網紅以「筍工」來形容,Nat表示與做教師工作性質很不同:「平時係對住細路仔,到event係對住大人,social skills好重要,但我唔覺得自己好叻,我有少少怕羞,所以要慢慢train,對住細路仔好天真單純可以直接啲,對住大人係要圓滑啲。」看似工種簡單,Nat就認為網紅也需要心機經營:「好嘅一面真係大家都見到,好多禮物收,好多人都鍾意收禮物,包括自己,收禮物一定開心,最新嘅嘢可以接觸到。有啲背後嘅嘢大家都睇唔到,例如影完一張相,我要做好多過程,又要執啲顏色,又要諗啲captions,一幅相背後有好多嘢去做,唔係大家睇得咁易。我試過upload一張相要兩個鐘頭,又試過一個朋友send啲嘢畀我,叫我兩日後要upload,但我第二日要返工,邊個幫我影相?搵我公司啲同事幫我影,可能佢哋唔得閒,就要等我阿哥,佢可能唔得閒,又要搵我男朋友,等佢放工先幫我影到。」
不少人美化網紅這個工作,外國的網紅一個帖文可以收天文數字收入,Nat表示對方背後有努力經營,而她自己亦坦言工作量多時,收入是多過她的正職,但她純以興趣來看待:「唔當係一個職業,對我嚟講係just for fun,首先我覺得呢樣嘢唔係好長遠嘅事,我都唔係日日做呢樣嘢,尤其而家啲活動stop晒,如果真係當一個職業,都會好慘。」做網紅野心不太大,而她真正的理想事業就是想擁有自己的學習中心:「自己好鍾意education,唔排除將來有機會想開一間自己learning centre,不過香港做生意好難,我同我朋友都係計過呢啲數,要儲多啲錢⋯⋯喺香港一年開好多間,但係唔係survive到?所以我要plan得好少少去實行,可能要十年時間,男朋友話要睇啱時機,啲租金可唔可以平啲。」
因爸爸關係,小時候已見盡不少天王巨星,她自言三歲已認識黎明:「成日都見到爹哋公司啲artist,好似黎明,我以前好鍾意,細個當佢係偶像,三歲已經見過佢,已經覺得佢好靚仔,成日見到張學友,覺得佢唱歌真係好叻。」她亦愛唱歌,有鋼琴五級水平兼懂吹長笛,但坦言不會效法哥哥入行做歌手:「我好鍾意唱歌,亦都有人問過我,不過第一,我唔夠阿哥靚,第二,亦都冇佢唱得咁好,我自己唔夠confidence,我係識唱歌,但好大進步空間。」現在她與哥哥簽同一經理人公司,成為同門,關係親上加親,她說:「我哋差5年,由細到大都好close,佢一定係我偶像,以前俾媽咪爹哋鬧,佢一定話佢錯,好多時都會,大個咗好多嘢佢幫我,做我司機同攝影師。佢冇乜畀乜advice我,佢就覺得做咩都好,最緊要開心,佢教識我影相,以前冇咁執着、是旦啦,影到我靚就得,而家好認真,佢好鍾意研究影相,有時佢幫我影product,我啲朋友覺得影到好似廣告咁。」
除了她的工作,目前對Nat而言,最為重要的事,當然是籌備婚禮,她與拍拖6年的男友將於今年9月在西班牙馬略卡小島舉行destination wedding,笑稱她爬了哥哥的頭:「我唔係好細個,都係適婚年齡,好多朋友都係呢一兩年結婚,個個都想後生啲生細路仔,我都想結婚一年後生BB。」她的婚禮已搵了wedding planner負責幫手聯絡場地事宜,Nat就跟進其他細節,問到有否與未婚夫因婚禮而有磨擦,她表示:「婚禮多數係我idea,我負責晒,佢話乜都唔理,話有咩需要幫手搵佢,自己好indecisive,就會問佢,so far冇乜磨擦,我哋屋企人兩邊都好好,通常磨擦都係budget同屋企人,總知我嘅wedding係要玩得開心,啲朋友嚟飲多兩杯。」
採訪:梁錦雯
攝影:周樂恒
攝錄:林德雄、郭賢興
化妝:Gary Lau of NARS
服裝:Bally
-----------------------------
【武漢肺炎】專頁
全民自救 抗疫資訊盡在《蘋果》