煲碟梗係要一家大細，有講有笑，咁先至過癮！但如果有親戚朋友上門拜年，咁最好就搵啲娛樂招呼吓大家。仲玩鋤大D、鬥地主？唔好啩！不如留喺屋企，齊齊拎住隻手掣，嘻嘻哈哈打機過年好過。唔講唔知，今年連家用機都玩上中國過年主題！好似PS3咁，佢就內置28款電子揮春，免費俾各位單撈，題材更同機民息息相關，非常有意思；例如「戰無不勝」，亦有傳統揮春好似「心想事成」、「財源滾滾」等，最重要嘅係，佢唔單止免費單撈，解像度更足夠你透過Wi-Fi或藍芽，直駁Printer印出嚟，變身成實體揮春，貼喺主機上面，特別有氣勢！

另外，玩家仲可以去PSN單撈全新或經典遊戲，例如《炸彈人》、《全喵推桿高爾夫》等，選擇與親朋戚友雙打，又或者挑戰網上高手，最緊要由即日到3月4日，通通以半價發售，激減程度多達$160蚊，趁新年假期，買嚟自己玩吓都抵！