真正豪宅 - 左丁山

蘋果日報 2007/02/19 00:00


今日丁亥年初三,按香港人習慣,係到沙田車公廟上香之期,今年市面咁旺,睇怕有十萬人以上到車公廟排長龍。
交稿之時,仲未知劉皇發喺車公廟求到邊支籤,一般以為,○三年何志平局長求到下籤,○四年改由劉皇發上香求籤,由○三至○六年一共四年,無論上中下籤,似乎都好靈喎。去年劉皇發求到第七十五上籤:「肆業求謀各有方,朝為田舍暮為皇,田可耕時書可讀,自然利就有名揚。」眨吓眼,一年已過,現在睇番呢支籤,丙戌年全年經濟氣候良好,市民搵到食,失業率下降,與「田可耕時書可讀」嘅意思大致脗合。既然車公籤文靈足四年,今年劉皇發求到乜籤要睇真啲。
大概有讀者或會鬧左丁山迷信,非也,一年講一次,趣趣哋,有何不可?如果唔係有好多人信風水,大埔豪宅推銷,使乜用咁多錢搵風水師講豪宅地皮風水,拍成廣告片,在電視台播完又播,睇到你悶為止。左丁山好有興趣知道,該大埔豪宅推出風水廣告之後,是否銷路好好,達到預期效果呢?
新年前碰到住在「鹿茵山莊」嘅住客W,佢收到唔少宣傳物件,叫佢去大埔豪宅睇吓,住客W話:「風水就可能係好嘅,不過咁多間屋迫埋一齊,未免稍欠貴氣。」住喺洛杉磯比華利山就夠貴氣嘞,大明星豪宅隔籬嗰間屋,幾乎在半里路以外,點似香港一啲「豪宅」與「豪宅」只係隔住一面牆或唔夠十呎八呎。
貴唔貴氣都好,左丁山冇資格住,冇資格買,不過有時有幸去到一啲大班屋吃晚飯,就好佩服人哋幾十年前買地建屋點解會咁有眼光。兩星期前去中峽道賓架大班屋食飯,人客之中有陳校長學生在,有陳校長兩三成工夫,佢一望左右前庭,暗呼一聲「正正正」,佢話左青龍右白虎(左右皆有山倚傍),前看香港仔南區有水,最妙有鴨脷洲在其間,於是水可積聚,唔係水來水去。左丁山望真啲,係噃!幾十年前洋人買地起屋,似乎搵過高人畀風水意見,此乃真正貴格豪宅也。