上星期有個Candidate搵我，都算係一個老朋友。Jimmy三十幾歲，在中資大機構任職Senior Accountant，話自己份工停滯不前，冇乜前景，想轉工又唔知轉咩好。姨媽姑姐又成日催佢結婚，溝極都溝唔到港女，公司D北漂又冇興趣，問我點算好。我心諗：「首先你要有。」

其實份工喺我初出茅廬仲係Consultant嘅時候幫佢搵嘅，朝九晚六，食飯兩個鐘，過時過節仲有大利是，蛇齋餅糭，福利好過投票俾民建聯。Grad咗之後佢都冇咩進修過，CFA／CPA／MBA樣樣唔關佢事，依然係揸住個Local University Degree 。十年年資，個Title都只係多咗個 「Senior」喺前面。

佢以羡慕嘅口吻同我呻，同屆有啲叻仔嘅，就算唔係CEO／CFO都至少做到Managing Director／General Manger。但人哋背後付出幾多又講你知咩！好似小弟咁，日日踩十幾個鐘，一份人工，當兩份工打，有時為咗見Candidate ，Skip Lunch 再Skip埋Dinner，搞到成日胃痛。身邊人都頂唔順我嘅Tight Schedule，同埋成日Ad-hoc見Candidate ，女朋友都換咗幾個囉。捱咗幾年，終於捱出個未來。除咗多幾條皺紋，仲跑夠數，正式收爐，可以安心放個聖誕跨年長假，去以色列耶路撒冷朝下聖，可能會遇到Gadot Varsano，咁就唔駛再過Lonely X'mas。

做Headhunter其實要有三頭六臂，有時做埋人生導師，愛情／心理輔導專家，幫Candidate搵工搵老婆，解決愛情問題。又到年尾，如果升職加薪份Appraisal計埋打機表現，Jimmy應該可以升得快啲，呢幾年《 Monster Hunter 》／ 《FIFA》 ／《NBA2K》都打爆晒，灌注晒精力同時間。有幾多個人可以好似達哥咁，打機打到做CEO，開手遊公司，萬中無一嘅傳奇。

Jimmy又同我講，Kelly Cheung真係好正，入得廚房，打得任天堂，仲開埋Live齊齊打機。馮盈盈雖然係港姐，但夠貼地，陪男友掃街，做節目又真性情流露，男友生日仲送埋Zero電競椅。問我點先可以遇到呢種「宅男女神」。

我笑而不語，心諗你就係屋企打《Vampyr》，淨係識FF自己係醫生，保護被神秘勢力攻擊嘅醫院，做虛擬英雄。盈盈男友除咗打機叻，人哋仲係會考10A狀元，而家係瑪麗醫院醫生，又有家底又靚仔。

你想有筍工埋身？又想有女神獻身？首先要裝備自己，就要踏出Comfort Zone。唔係日日坐係個位，自怨自艾，好工就會喺天跌落黎，唔積極進修Upgrade下個Resume，唔見下Headhunter Update下個Market，永遠你只會係個粒埋喺禾稈草下面嘅珍珠。

文﹕久保
人稱「全職獵人」獵頭界紅人，見盡獵場光怪陸離，商場奇聞軼事。

investMAN
For People of Style & Substance
掌握理財智慧 感受生活品味
http://facebook.com/investMAN.hk