自從梁錦松承認同伏明霞拍拖之後,兩個名字完全分唔開,出街大把人恭喜佢,好似噚晚出席工業總會周年晚宴時,工總主席羅仲榮在台上公開祝福佢,又話贊成政府做proactivebusinessenabler,即係積極為商業創造條件。
興奮到不得了
阿松噚晚的表現一如前兩日,興奮到不得了,上台先澄清自己所講係proactivemarketenabler,係講緊市場唔係商業,又話公僕係服務市民,唔係干預市場咁話。講到呢度,佢突然話鋒一轉,失驚無神多謝羅仲榮介紹佢係Antony,唔係叫佢做Michelle'sfriend!
Michelle係邊個?梗係做咗幾日報紙頭版的伏明霞啦!八方聽到阿松咁講真係好奇怪,首先好似從來冇人叫佢做Michelle'sfriend,而且佢明明講緊正經嘢,無端端咁鬼主動提起伏明霞,反映佢哋兩個幾咁癡纏。
八方之後問阿松,佢咁講係咪驚伏明霞的風頭蓋過佢呢?佢又真係答得坦白:「哈哈哈!佢已經蓋過我好多啦!」我哋嘅財爺幾時變得咁謙虛呢?唔通真係好擔心?「冇啲咁嘅擔心!」咁問番正經公務,究竟佢幾時上京述職呢?一於唔答!
不過,梁伏戀又真係幾大件事,搞到連與阿松同枱坐的德國駐港總領事Beuth都知道,重即場恭喜佢㖭。
(圖)又一個三人行,不過今次唔係梁錦松、伏明霞同葉靜子;而係(左起)阿松新聞秘書譚志源、阿松同工總主席羅仲榮。
E-mail:[email protected]