爸爸‥爸爸…之前吳鎮宇同囝囝Feynman上咗大陸真人騷《爸爸去哪兒》，囝囝喺節目中不慎跌倒，撞傷眼角，緊急送院縫咗兩針，令人關注小朋友上真人騷嘅安全問題，之不過呢個節目喺大陸幾受歡迎，依然有唔少星爸同仔女上去，早前傳過《爸》第五季停播，但究竟係點，一直未有官方講法。

話說本月1日，大陸報道湖南省紀委檢察廳官網發佈中共湖南省委對湖南廣電巡視「回饋以及整改的結果」，指湖南衛視部份節目存有問題，其中親子節目《爸爸去哪兒》被點名批評，指其為吸引觀眾眼球，存在過度消費明星子女之嫌，不利青少年健康成長，被國家廣電總局決定叫停(文章連結: http://bit.ly/2iPkiz6 )

報道出街之後，《爸爸去哪兒》微博官網一直沉默。到今日，即節目出街前一日，先至再更新。即係，有得播？

之前有網民反駁稱，《爸爸去哪兒》唔係冇得播，而係改喺網上播。咁聽日《爸爸》係咪真係如期出街？聽日中午12點就知。

今日網上流出小春同囝囝嘅宣傳片，小春讀白以蝸牛喻人生，有一啲說話想同大個咗嘅小春子講，大晒溫情，當中係希望父子彼此時區嘅路走慢一啲。連老婆應采兒睇完都受唔住呢啲「溫情」，留言「估計Jasper長大了看這個會哭」，仲加咗幾個哭笑不得嘅emoji。

影片一開始見陳小春扮老，向鏡頭講：「阿仔，你仲記唔記得嗰隻蝸牛，四歲嗰年夏天，我哋喺花園裡面，睇到嗰隻，你問我點解佢爬得咁慢，我話俾你知，萬事萬物都有自己嘅時區，就好似有啲花只係夜晚先開，有啲美麗係唔需要目光同讚嘆。」

喺片中，小春係以一把生硬讀白去講：「有啲星星會一齊發光，而有啲飛翔只係為咗變塵埃，當你告別童年，獨自闖蕩世界時，你就會發現時代運轉得越來越快，你就會發現冬山兒時嘅樂園已經係一片廢墟，但唔好難過，世界無論點變，嗰啲轉瞬即逝嘅美好回憶，一樣可以永恆，只要你記得佢，你就可以打破標準嘅模式，你嘅人生係擁有自己喊停嘅權利，你可以選擇唔咁堅強，但咁並唔代表懦弱，當命運揮棒而嚟，你要毫不猶豫咁去反擊。」

成條片感覺有啲怪怪哋，完全唔似平時嘅小春，為咗迎合大陸市場，係要咩都試吓嘅!

小春又拎住個電話，似乎想講呢個世代個個「機不離身」，佢又讀白：「當虛擬同現實開始混淆，選擇做唔完美，但真實嘅自己，當時代超越咗發展，你依然可以選擇慢落嚟，去兜下風、去浪費一下時間，去做你想做嘅嘢。」結尾佢又話：「喺自己時區裡面，要不急不趕，不卑不亢，搵到嗰隻蝸牛慢慢行，一路回到小時候。」

成條片都抽象到一個點……唔通隻「蝸牛」識穿越時空，如果唔係，點返番去細個嗰陣，聽完都令人摸不著頭腦噃!!