韓國女團2NE1早前大地震，宣佈敏智約滿離隊後，將改以三人姿態再戰樂壇，預計今個夏天出新歌。雖然好姊妹敏智離開，不過Sandara都會尊重佢嘅決定，今日傍晚佢就由首爾出發來港，準備聽日連踩兩場活動，分別現身蘭桂坊嘅產品發佈會，同埋銅鑼灣嘅粉絲簽名會。

戴帽同太陽眼鏡嘅Sandara出發時心情唔錯，見到傳媒都微笑揮手saybye，佢仲動作多多，一時抬頭望天，一時又伸手玩吓頭髮咁，真係好得意。據知佢今次來港會留多幾日，唔知係咪想過吓遊客癮四圍去呢？