梁班子中人有幾辛苦，唔駛八方學葉劉咁畫晒出腸啩？所以當新聞處處長聶德權攞住個煲狅敲，唔排除有人誤以為，佢工作壓力太大下「爆煲」；之但係呢，三耳處長邊有咁唔捱得？查實佢今日隨住音樂起勢狅敲煲，都係為咗力撐東華三院位於白田邨、下月開張嘅「膳深軒」，拍住東華主席何超蕸一齊「煲起」呢間社區飯堂。

「膳深軒」服務對像係貧困嘅長者、低收入同綜援家庭，只要經過審核成會員，就可以用10蚊享用熟食午餐或晚餐。做過社會福利署署長嘅聶德權今日到咗「膳深軒」先試為快，午餐一粒飯都冇剩，致辭時笑笑口話「土地好緊要」，否則點可以有呢個飯堂，為有需要人士送暖？

東華三院聽日仲有別開生面賣旗籌款，除咗搵嚟人氣插畫師PlasticThing設計得意紙旗圖案，聽日至9月2日期間，市民只要紙旗創作以慶祝東華三院145周年為題嘅作品，並將旗相上載東華facebook，就有機會得獎。何超蕸希望大家多多支持，笑稱東華招牌雖然逾百年，但唔代表老土㗎。