「禪師」積遜（Phil Jackson）教波功力毋庸置疑，11隻冠軍指環足以叫大家收聲，但佢自從2014年出任紐約人行政總裁後可謂搞到隊波一鑊粥，同安東尼（Carmelo Anthony）鬧不和唔在講，逼教練打三角戰術令戰績不進反退，最慘係連唯一「功績」、2015年以第4順位選中嘅拉脫維亞大前鋒普辛基斯（Kristaps Porzingis）都打到冇癮，盛傳塞爾特人有意出手羅致去季場均貢獻18,1分、7.2籃板嘅KP，但紐約人一方有意搶得塞軍啱啱同76人交易得來嘅「探花」籤，雙方至今未有共識。

手握選秀第8籤嘅紐約人聽落好似好進取，但美國《ESPN》周四透露，有被視為前15順位人選嘅新秀爆料指，早前去到紐約人試訓時，71歲嘅積遜喺場邊竟然不停「釣魚」瞓着，表現完全唔專業同唔尊重球員！咁搞法，難怪有紐約人球迷喺選秀會場外高舉標語，要求積遜下台。