Y醫生係婦科專家，以前有唔少準媽媽搵佢照顧，一直至到入院生產，嬰兒出世；現在香港女士不事「生產」，每個月出生嘅嬰兒唔夠四千，Y醫生惟有及早轉型；生意仍然不俗。問佢點解會練得一身好功夫呢？Y醫生話：「我哋讀醫時期，讀書叻仔至入得醫學院，𠵱家都係。叻仔之中，又可粗略分為三類，最醒最有興趣做研究嘅，就會繼續鑽研，喺大學教書，成為教授，呢類人最清高，我好佩服；第二類就係我呢一種人，讀書好，立志做私家醫生，做兩三年公立醫院，立即出嚟掛牌，與私家醫院掛鈎，八十年代搵到九七，夠退休啦！第三類就係唔敢做研究，亦個性保守嘅，就一路留響政府，為人民服務。現在管住我哋嘅一位高官，當年上堂唔出聲，上tutorial唔參加討論，講師幾乎唔認得佢；唏，做官就掂嘞。」

Y醫生未做私家醫生之前，就膽粗粗去港島某著名私立醫院見大國手，大國手見佢態度進取，覺得孺子可教也，就吩咐佢：「你未夠經驗住，先去學習產婦科，學曉就嚟搵我！」Y醫生立即要求調去產婦科，派去九龍區某大公立醫院，一上工，啲產婦就多到做唔切，senior乜都叫佢做，Y醫生手震震去開刀，幾個老護士教佢：「senior咁咁咁㗎！」Y醫生諗起都好笑：「最初嗰兩個月，根本係啲老護士憑豐富經驗教我點樣處理產婦嘅，senior就喺樓上睇書啫。做咗一年，已是工多藝熟，我已經可以下刀如飛，百發百中，於是立即辭工，去大國手度。」今時唔同往日，現在啲年輕醫生即使在公立醫院成為大仙，都未敢出嚟闖蕩江湖也。