【爆相爆片】身為教徒嘅44歲孫耀威同36歲陳美詩（Macy）拍拖8年，早前被《蘋果》踢爆計劃今年結婚，當時老孫仍堅稱：「未定呀。」Macy仲話：「冇收到風喎。」前日佢哋現身墨爾本影結婚相，被讀者蘇小姐透過「爆相爆片」捕獲。
讀者蘇小姐表示，前日喺墨爾本大洋路遇見孫耀威影結婚相，老孫着灰色西裝打黑煲呔襯黑西褲，相信佢係着自家品牌禮服，準新娘Macy就着粉紅色大傘裙，佢哋都冇乜表情，唔知係咪影咗好耐有啲攰。佢哋喺當地著名景點Loch Ard Gorge取景，老孫拖住Macy企喺壯麗崖邊，腳下係波濤洶湧嘅藍綠色大海。

「多謝大家關心」

一直唔認結婚嘅老孫，之後喺社交網貼着白恤衫打黑煲呔嘅禮服相，留言：「今天我演的是一個bartender！期待遇上一個美女客人。」對於被爆影結婚相，老孫噚日以短訊回覆：「哈哈！多謝大家關心！因為真係未定實呢，我來澳洲，其中主要原因是要出席一個慈善活動的，影相……其次啦。等我回香港再講啦！如定了甚麼會再公佈的。」