識玩應該咁樣玩,等本土民主前線梁天琦教吓大家!特區政府欲以一張確認書,封殺撐港獨嘅本土派入立法會,喺新東出戰嘅本民前梁天琦首當其衝受影響,被選舉主任羅列佢喺報章甚至facebook嘅撐港獨言論作「罪證」,要求回覆澄清主張;既然fb係搜證途徑,梁天琦一於玩大佢,另設fb專頁留言「會擁護《基本法》及保證效忠香港特別行政區」,如果咁都唔畀佢選,仲有冇奶油先?
梁天琦日前刪除舊fb專頁,另起爐灶設新fb專頁,以《基本法》黑白照做封面,並留言:「我,梁天琦,示明我會擁護《基本法》及保證效忠香港特別行政區。」同時附上被市民諷刺為「洗腦歌」嘅政府宣傳歌曲《熱愛基本法》YouTube連結,證明佢對《基本法》幾咁上心。