嚟緊星期日就係七一，唔少市民預備上街表達施政訴求，諗返03年因為反對《基本法》23條而首辦嘅7.1大遊行，時為大律師公會主席嘅梁家傑都有參加，從此踏上政途；15年後今日，做過議員又選過特首，縱然退下火線仍心繫時事，同樣冇變嘅仲有佢老成持重嘅樣子，唔通三歲定八十？「我細細個嘅樣已經好老積嘞，返學第一日已經被老師揀做班長。」

58年出生嘅傑哥，今年初「登六」。無論喺生活同工作，都係領導角色，例如喺屋企佢係有兩妹一弟嘅阿哥；至於喺學校嘞喎，小一至中三都係班長嚟㗎喎，佢個人認為自己個樣生得老積，老師覺得佢成熟穩重而委以重任，但亦因為老積，令佢初中學生時代變孤獨精，「梗係啦，我代表高牆，去管理啲雞蛋喎，啲蛋梗係同你唔friend，佢哋之後仲話呀，唔敢同我改花名添呀」。中二嗰年見家長，班主任更曾嚇親梁爸爸，「佢話見到我小息時，同學喺操場嬉戲，我攞住包維他奶喺坑渠邊踱步，驚我有自閉症……」可見當時喺九華讀書嘅佢，孤獨程度幾咁嚴重。

做班長做到人見人怕，傑哥當時開始諗解決辦法，中四決定加入學生會，「咁就免疫唔使做班長」。當時做內務秘書，簡單而言就係打雜，「拖地、倒垃圾、寫蠟紙，乜都要做」。走出comfort zone，傑哥都豁然開朗，至中六就選學生會主席，無人挑戰下自動當選。

而家喺法律界咁出眾，但原來傑哥那些年諗過做醫生，「因為威囉，覺得做醫生好巴閉」，其後都係覺得法律啱佢多啲，所以入咗港大讀Law，仲識埋太太陳淑儀。又估唔到喎，傑哥喺大學期間遊遍中國大江南北，幾乎只係得青海省同新疆未去過；點解三年暑假都係背包遊大陸？「歐洲要搭飛機太貴，冇錢吖嘛，返大陸坐火車就平啲」。而唔知點解啦（應該唔係關佢特別靚仔事……），佢嘅團友都係以女同學多，佢好記得有次搭火車，有個內地人用普通話問佢：「老師帶著五個娃娃去旅行？」，一語中的，「我個樣仲唔係老積？」