萬聖節再加股災，今年10月氣氛唔使講梗係零舍嚇人！港股今年10月份跌幅4047點或22.5%，係97年10月以來最大單月跌幅，如果以波幅計仲誇張，高達7600點，可謂「浪」到散戶暈陀陀。
坊間輿論普遍認為，港股10月份跌幅咁誇張，係基金面對洶湧贖回潮之下非理性地瘋狂掟貨所導致，加上其他企錯邊炒家孖展被逼斬倉、Accumulator投資者接貨之後睇淡個市隨手就沽等多種錯綜複雜因素夾埋，所以個市跌到好鬼慘。有口痕友話港股踏入11月，由於大市要癲都癲完，走勢雖然未必好似10月般恐怖，但都唔係好世界，可能後市將進入牛皮悶局，好友或會幾無癮。

可納入低吸觀察名單

期內個別跌幅不小的股份似有追落後迹象，昨日逆市微升2%，重上8元的新創建（659）係其中一隻可留意股份。新創建截至今年6月底止全年純利38.2億元，增長90%，盈利激增主要受惠攤佔物業收益入賬16.33億元所帶動，集團尚餘四成海濱南岸貨尾待售，管理層雖揚言未擬減價售樓，但樓市轉趨淡靜已可預期，故來年售樓收益不能期望太高。
不過，新創建業務多元化，整體表現四平八穩，負債比率又不算高，公司近期亦趁淡市展開股份回購行動，可將之列入低吸觀察名單。
方星俠