原本冇乜人認識嘅0靚模李悅彤（Liddy），因今年六月，被本報獨家拍到與李心潔老公彭順喺圓方攬錫斷正，被指為第三者而「人氣急升」，再加上Liddy父親李德仁喺啟晴邨槍擊案中吞槍自殺，轟動全港，令Liddy成為C1及A1頭條主角，Liddy更為此一度「潛水」避追訪。

事隔三個幾月，彭順獲太太李心潔原諒，早前更拍拖出席許茹芸婚宴，而Liddy亦漸漸走出陰霾，除咗喺instagram更新近況外，早前更被拍到重投舊愛Simon懷抱。

今日有雜誌訪問Liddy，放下包袱嘅佢，剖白曾經錯愛彭順及飽受喪父之痛。

被指第三者嘅Liddy，曾面對千夫所指，對於有傳彭順為挽回與心潔婚姻，而主動斬纜箍煲，但據雜誌所言，彭順係優柔寡斷，兼一直拖住，未有向Liddy作出交代。

Liddy於訪問中表示：「人生總會遇錯嘅人，但遇到錯嘅人唔願走就係自己問題，我意識到呢樣嗰時，自己就一定要做個淡定決定。」

咁幾時先醒覺痴心錯付？Liddy就話：「當佢哋（彭順及李心潔）份聲明出咗嚟，我覺得唔可以再畀一個假象自己，就算之後再有任何暗示嘅話，都唔可以再咁執迷同糊塗。」

原來Liddy所講嘅假象，就係彭順曾畀佢承諾，令佢以為呢段婚外情有出路，不過原來男方只係信口開河，Liddy又謂：「當我鍾意一個人，就相信佢講嘅嘢，我係個唔會胡亂作出承諾嘅人，但有啲人原來可以講得出做唔到，順口講下，只怪自己天真易信人。」