建滔化工老闆張國榮真係好鍾意國泰航空，佢上星期見國泰完成600人裁員行動，旋即再度入市增持國泰，建滔喺國泰最新嘅持股量已經去到8.06%，佢呢手貨市值39億元。

花28億　持股逾8%

建滔首次披露持有國泰係舊年12月，因為增持到超過5%，所以要向聯交所申報，到咗今年3月同5月，佢又掃咗兩輪，連埋上星期四，單係今年3次掃入國泰股票，已經用咗5.3億元；加埋佢之前動用22.6億元買5%，建滔至今花近28億元買國泰。
建滔嘅入市價亦一次高過一次，舊年底講緊平均價10.2元，上星期去到12.61元，真係要十分睇好國泰，先至會咁掃法。
按建滔年報，佢舊年底有現金64億元，上市公司有多餘錢，買股票投資收息無可厚非，之但係，建滔市值300億元屬於二線股，大拿拿拎幾十億元買重一隻航空股，會唔會太過單一？張國榮怕唔怕被小股東怪佢唔識分散投資呢？
再睇番國泰股權，大股東太古A揸住45%，中國國航揸住另外29.99%，加埋接近75%，國泰與國航互控，市場一般估計兩者關係好好，不過金融市場變幻莫測，太古係時候好好同張國榮摸個底，唱番句：「如你共我心不相同一生愛情都白送」。

李華華
mailto:[email protected]

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk