多蒙特噚日舉行巴西對加納呢場南美鬥非洲嘅大戰。有線直擊隊喺當地做直播，見到大部份入場嘅巴西球迷都係上咗年紀，或者係啲有經濟基礎嘅人士；相反一班熱血巴西青年，因為冇錢嚟歐洲，所以現場打氣嘅氣氛都唔及其他歐洲球隊。
世界盃門票被搶購一空，部份買唔到飛嘅球迷，想入場睇波就要畀多少少錢買黃牛飛嘞；不過，今屆門票正價最平都要60歐元（即係600幾蚊港幣）一張，對於南美洲嘅球迷絕對係一項高消費，再加埋機票、住宿等費用，唔係好多南美球迷可以應付得到。問過其中部份巴西球迷，原來佢哋喺巴西算喺中產人士，今次飛到嚟德國睇波，預計要用3至4百歐元（即喺成3至4,000蚊港幣）買飛睇一場國家隊比賽，呢個「公價」算係勉強可以接受。不過，呢班中產球迷嘅年紀大部份都有番咁上下，睇波時嘅熱情始終都唔及啲後生仔，多數都好斯文，最多只係飲吓啤酒吹吓水。所以話，南美球隊喺歐洲好難贏冠軍，可能就係冇咗班年輕熱情球迷嘅大力支持，多多少少都有啲影響。

主場球迷唱歌搞氣氛

現場所見，除咗巴西同埋加納球迷外，另一個佔較大比例嘅球迷，相信會係東道主德國球迷。呢班主場球迷，見到兩隊波有啲沉悶或者喺冷場嘅時候，就會主動起身唱德國國家隊嘅打氣歌，真係識搞氣氛。雖然佢哋咁樣做好似無厘頭，但係悶場時有球迷大叫唱歌，總好過死氣沉沉咁睇世界盃。
有線06世界盃嘉年華，將於30號晚11:30pm——1:30am，播出世盃外景隊採訪滙報