今日有馬場大盛事，就係二○○六年打吡決戰，所有馬主，練馬師、騎師都恨贏打吡恨到發燒，逢係打吡戰，實會爭到打甩髀，有你冇我。今日更有大孖沙鬥搏，夠晒刺激。
第十場打吡賽，大熱門肯定係二號「爆冷」，馬主何鴻燊行運，抽檔位之時，剩下第十檔與第十四檔，四號「喜得法」馬主代表抽先，抽到十四檔，根據馬會統計資料，沙田Ａ跑道跑二千米，十四檔嘅上名率係一隻大鴨蛋，問你暈未。剩番個十檔畀燊哥，佢笑笑口話好物沉歸底，梗係啦，第十檔贏頭馬（勝出率）係13%，上名率25%，好過第十四檔好多。況且燊哥用私人飛機接載騎師蘇銘倫由杜拜返香港騎「爆冷」，使費唔少，頭馬獎金八百萬元，喺佢眼中，算係乜！

「喜得法」本來有啲機會嘅，馬主係幾位資深會計師，掛頭牌嘅係羅兵咸會計師樓主席楊紹信，羅兵咸有幾千個夥計，今日不妨同老闆打氣。信和主席黃志祥有隻五號「喜利多」上陣，照計希望不大；玩具大王蔡志明隻七號「銀太陽」，亦係麻麻；大馬主何壽南（英文名亦係StanleyHo）隻八號「一定好」配上法國最佳騎師柏兆雷，你話畀佢順利放頭帶領，控制步速嘅話，可以創造奇蹟，以前「南哥」都有隻「一定威」以冷門姿態贏打吡啦！
呢場嘅次熱門會係「莎莎」老闆郭少明隻一號「終身美麗」，郭老闆兩隻馬「明艷照人」、「靚得精彩」嘅戰績比較普通，憑呢匹「終身美麗」威番一輪，今日夠唔夠「爆冷」砌呢，牌面上就處於下風。郭老闆係中大新亞書院校董，已故新亞校董胡世榮憑隻「計得精彩」贏「香港盃」，之後猛捐獎學金畀新亞學生，既有先例，郭老闆贏得打吡嘅話，點都會有獎學金益新亞學生嘅。此外冠忠巴士老闆黃氏昆仲之黃良柏有隻三號「新力升」上陣，會爭取與廐侶「爆冷」串Ｑ，係一路奇兵。今場左丁山會以二號「爆冷」做膽，拖「終身美麗」、「一定好」、「新力升」，及睇唔通嘅六號「威利好好」，十三號「百利旺」。