報紙訪問盈保主席袁天凡講保險業進軍內地，袁天凡話金錢不是工作原動力。銀行經理Ｖ（未有資格叫做賓架位，升多幾級先啦），三十零歲，素來視袁天凡為偶像，希望有一日能有袁天凡之成就，問左丁山點樣詮釋金錢不是工作原動力，左丁山先潑經理Ｖ冷水：「袁天凡未夠四十歲已經做聯交所行政總裁，《亞洲華爾街日報》稱呼佢為ThePrinceofFinanceinHongKong，請問你四十歲之前，可唔可以做到銀行老總呢？」經理Ｖ面紅紅咁話：「做到助理總經理已經好好想頭。」

左丁山對經理Ｖ講：「咪係囉，你冇袁天凡咁本事，就唔好跟偶像講金錢不是工作原動力嘞，人哋老早上晒岸，目前爭取嘅係成就，唔係成就帶來之果實，就係經濟學大師熊彼得講：tosucceed,notforthefruitsofsuccessbutforsuccessitself，我哋未有資格到達如此境界，最好唔講住。」
經理Ｖ乃係醒目之人，一聽就明，欣然收線。
放低電話，左丁山想起三十歲出頭之時，俾獵頭族苦纏，卒之轉工，人工由九千幾蚊加到萬五蚊一個月。銀行高級副總裁?香港台灣總管立即召見，對左丁山講：「你喺銀行大把前途，我哋好睇重你㗎，金錢不是工作之原動力，你要有工作滿足感、成就感、忠誠感，呢啲係金錢買唔到嘅，留番喺度啦，下個月就升你一級、人工去到萬二蚊一個月。」
左丁山聽咗好感動，但回心一諗，要供樓、有咗細路、要買新車，金錢對自己非常重要，金錢先至係工作原動力，而高級副總裁已有半山大屋、有遊艇、有平治、仔女入咗大學，金錢真係對佢失去吸引力，最緊要做工做得威，立場與左丁山完全唔同。於是多謝佢之後，堅持辭職鬆人，不過之後浮浮沉沉，至今未能望袁天凡之項背，到現在仍然講唔出：「金錢不是工作原動力。」