12月1日，民主黨前主席何俊仁帶着滿身傷痕，與親友度過68歲生日。遇襲至今雖近一個月，但講到事發經過及身上處處瘀黑的傷痕，他仍心有餘悸。何在中環律師樓憶述事發經過：「第一下打落嚟好重，嗰陣時我行緊，佢衝上嚟就全力打落嚟，我感覺打落嚟係啲硬物，但有啲彈性，即係一條粗嘅藤條。」他認為，兇徒刻意不襲擊頭部，以免被媒體拍到他血流披面照片而獲大眾同情。遇襲原因與呼籲民眾遊行，或在網台批評警暴及黑社會有關，但他強調不會因此退縮，「退縮就會有寒蟬效應，冇人敢去出聲，白色恐怖或者黑色恐怖就產生效果。」

記者：林熊　攝影：周子惇

11月19日晚上7時許，何俊仁乘坐港鐵返家，在港鐵天后站一巷仔，被3名蒙面人襲擊。對於遇襲原因，經過層層分析，他認為有三大可能，「我同黑社會冇乜嘢轇轕，又冇私人恩怨、冇錢銀糾紛、冇感情問題。」故他相信與政治有關。

何指出，岑子杰8月29日遇襲，幸有同行朋友保護而免受傷；同日，申請在元朗遊行的鍾健平亦遇襲；9月24日，法輪功學員廖秋蘭到荔枝角警署，與警方商討10.1遊行活動安排後也遇襲，「佢主要目的，就係恐嚇我哋，想我哋唔好再去召開呢啲集會。」

「第二個可能性，就係我啲網台，好多嘢我係攻擊黑社會，話依家共產黨會利用黑社會嚟民眾鬥民眾，黑社會都可以流水咁，佢唔需要好似警察咁擺陣，黑社會同你哋打，再滲一啲國安、武警入嚟黑社會度，打完你乜嘢都唔使負責。」

「第三個可能性，就係有人話我爆理大個『公主』 出走，曾鈺成帶佢出嚟，但我覺得唔會，唔關事。」何講出這個可能性後，又搖搖頭自我否定說：「就算我講啱都好，話我洩露國家機密，但呢樣嘢唔足以構成我俾人打。」無論遇襲原因是甚麼，從揀選伏擊地點及行事手法，何相信是黑社會所為，更笑稱：「聽講黑社會手上有份名單，我係頭嗰幾名啦。」

「有冇擔心有日兇徒攞你命？」記者問何，他回應說：「呢個風險我唔能夠排除，縱使我嘅人身安全受到威脅，無論如何，今日我所面對嘅，比起好多第二啲喺極權國家所面對嘅，我係小事。你睇俄國有好多人被暗殺，包括記者、反對黨，但人哋一樣企出嚟發聲，否則成個社會得一把聲音，當權者咪惡晒？ 」講到面對的死亡恐嚇，何眼神堅定說不會退縮，因退縮會有寒蟬效應，產生白色恐怖。

何補充，在中國大陸有很多維權律師，一樣被人打，一樣被拉去坐監，但他們都勇敢站出來，「所以我覺得我唔係特別勇敢，更加唔講得偉大，我只覺得唔應該退縮，我有個責任喺呢個時代，要企出嚟講真心說話，為普通市民發聲。」

2006年8月20日，何參加反銷售稅遊行後，被人打到爆頭，疑與他的律師業務有關，明知是受襲高危人士，為何不請保鑣？「2006年嗰次遇襲後，當時個當事人驚我唔接個案，同我請咗一個保鑣，同埋有一個司機，有部車畀我用，呢個安排維持咗6年，直到官司打咗差唔多大部份啦，我都覺得唔使啦。」

「講嚟講去，我都係一個平民，點可能要請保鑣跟住我，令我唔可以過一個正常嘅生活？我就唔會咁做啦。」他強調日後會比較醒目，少行僻靜之處，多坐車直接回家，亦會經常改變回家路線和時間。

談到傷勢，何透露，遇襲時只覺是皮肉傷，後遺症於事發後數日才浮現。「當時嘅傷痕，好似雞毛掃打嘅紅血痕6、7條；另外兩隻手，我懷疑係棍打；一邊（左手）就有少少爆開需要縫針；一邊（右手）就腫晒有少少骨裂。」幾經記者要求，何才肯展示手機內的相片，「肚度有條好長嘅血痕，當時我冇感覺到佢打過我個肚，直至一個禮拜左右，成個肚黑晒。」

人稱「鐵頭仁」的他認為，兇徒今次刻意不襲擊頭部，以免被媒體拍到他血流披面照片而獲大眾同情。「嗰晚我就返咗屋企，外表睇唔到乜嘢傷痕，出院時仲係身光頸靚。」但兩、三日後，被毆之處由紅轉黑，一周後，整個腹部均瘀黑，兩邊手臂紅腫，原本計劃去歐洲的演講，都被迫臨陣換李卓人替代。

臨近新年，何希望勇武派能先冷靜，除了勇敢亦需智慧，「大家要好好諗未來嘅路點走落去。」過去一年香港充滿很大的挑戰，也有很多衝突，很多年輕人為本港的前途搏鬥並犧牲很多。他認為送中條例被撤回、香港受國際關注等，均是成果，對抗爭者的付出同時感尊敬及難過，「全世界人都為香港以往一年，充滿住驚訝，好多有創意、令人感動嘅抗爭，亦會記喺歷史上寶貴嘅一頁。」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568