弄孫為樂、三代同堂，此刻無價，但如果你喺香港寬頻做，此刻有埋「假」！噚日香港寬頻（1310）宣佈，由4月1日起員工抱孫嘅話，就會多3日假，仲要冇限佢哋攞幾多次。換句話講，啲仔女可能一年內各有各生，咁就有機會放幾次，當然呢樣係「一胎胎」咁計嘅，否則嚟個四喜臨門，就未免太爽喇。發言人話，只要影張三代同堂嘅相嚟證明就得，笑言「信得過啲同事唔會造假嘅」。

良心公司有成24日假

喺本地企業嚟講，香港寬頻都算係多假期，一般嚟講一年有13日年假，但就巧立名目整多咗個「入職紀念假」同「家庭關顧假」出嚟，基本上呢兩日都包埋嘅。仲未計其他重要節日前夕放半日、每個月有一個禮拜五可以放半日假等。如果換算為假期嘅話，基本上一年有成24日假咁滯，算係幾有良心。
香港生活不嬲都好緊張，一般打工仔就算5天工作，以工時嚟計，喺全球嚟講都係高工時。政府成日話人口老化係大問題，其實叫啲大財團、大企業，整多啲「生仔」、「添孫」、「娶新抱或嫁女」假出嚟。為咗放多幾日假去下日本、韓國朝聖，可能會刺激多啲新血補充都唔定，唔使搞咩專才、150個單程證啦。

李華華
mailto:[email protected]