羅斯麥哥馬克未必個個識，但「射術」真係超晒班！講緊係佢嘅「射波」請假技術。呢位英冠阿士東維拉射手上個禮拜學人請假缺操，聲稱因為屋企度閘壞咗出唔到門，又同領隊布魯士講冇可能攀牆逃出；點知布魯士變身起底組直接踩場，仲影低嗰度得四呎六吋高嘅圍牆對質，結果呢位30歲蘇格蘭射手喺上周六同普雷斯頓踢成2:2嘅英冠連後備都冇。布魯士喺賽後記招話教咗廿年波都唔想搲爛塊面，但今次真係忍唔住「BIN C」。冇計，麥哥馬克舊年夏天以1,200萬鎊由富咸加盟，點知嚟到入得兩球，之前又試過稱病缺操話想返富咸，難怪布魯士要出聲。

講開經典「射波」理由，雖然港隊幾年前都有球員因為考電單車牌同去入境處申領工作證而缺操，但創作力量同幻想點都唔夠伊美梅賓沙（Emile Mpenza）鬥。呢位38歲前比利時國腳喺2008/09球季效力英冠普利茅夫嗰陣，試過話因為前一晚啪咗「偉哥」，點知藥效仲未散，惟有「硬」着頭皮咁請假喎！時任教練史杜洛仲喺自傳度讚嘆：「球壇對『荒謬』嘅標準已經夠晒高，但呢單真係冇得輸。」結果搞到俾梅賓沙告誹謗。