大家都知運動可以強身健體，不過工作忙、私人時間都要處理公務或陪屋企人嘅，自然明白要做到世衞建議，每星期做3日運動係幾有難度。一向都係大忙人嘅政務司長張建宗相信深明此理，佢噚日出席一個活動時，可能因為着嘅衫太緊身，不論企起身定坐低，條士啤胎都不自覺現形；佢都笑笑口話自己認真超重兼肥胖，皆因少運動！

的三下波分兩次

其實小肥張曾經講過，後生時係名副其實嘅「波牛」，不論睇波、踢波都好有心得。之但係做得高官，兼顧嘅嘢一籮籮，相信可以三五知己落場鬥波嘅機會相當少，所以噚日活動尾聲時佢要主持開球禮，佢未等正式開球，就忍唔住要「的」番幾下波過過癮。大家估吓佢「的」到幾多下？
畀些少數據各位參考：當時企喺佢隔籬嘅醫學界立法會議員陳沛然就「的」到三下。但陳沛然都自爆，做咗議員一年幾，雖然每星期勉強踢到一兩場波，但就冇辦法每星期都跑步，所以肥咗10磅，或者咁而技術生疏咗。
至於司長，佢都「的」到三下——不過分開兩次；「的」到最後一下，仲唔小心將個波「的」咗落台，佢都忍唔住掩口偷笑自己老貓燒鬚！唔知司長舊時嘅波友，會有咩睇法呢？

李八方