過去一季歐洲金靴獎得主係邊個？當然係射入37球嘅巴塞隆拿前鋒美斯啦！不過，如果話你知過去一季有位球員，聯賽上陣31場射入216球，場均射入接近7球，呢個入球率直情連美斯、C朗都要膜拜，你又信唔信？

介紹番，呢位16歲小妮子名為琳達（Linda Heinz），目前效力德國地區女子聯賽球隊SG Hickengrund。雖然入球含金量當然唔及西甲、英超等聯賽，但琳達跟隨父親Andreas衣砵，自2010年世盃支持德國隊後由田徑轉投足球懷抱，至今成為前線尖刀，更惹來職業球會招手。不過，琳達就話希望留隊，繼續同一班好朋友打拼：「我能夠攞到咁多入波，都要多謝佢哋！」