41歲嘅視后田蕊妮今年主持咗節目《女人四十》，今晚《萬千星輝頒獎典禮2018》摘下「最佳節目主持」獎項。阿田上台領獎便開始哽咽，仲要叫人遞紙巾，佢邊喊邊話：「原來真係想喊，呢個節目，我第一次自己構思、度橋有份參與，多謝公司畀咗好大空間，我學咗好多製作嘅嘢，發掘自己另一方面能力。」

阿田媽咪早年離開，但佢不忘答謝亡母：「多謝媽咪，因為……佢遺傳咗好多，我身上好嘢都係嚟自你（媽咪），也多謝爸爸，我會繼續做多啲好嘢，會令你驕傲有咁個女，我最後多謝自己，希望女人唔會被年齡規限。」

梁烈唯憑《是咁的，法官閣下》奪「最佳男配角」，上台前已經想喊，佢話：「我早知攞獎我就搵人化妝、梳頭啦。」佢喺台上多謝無綫14年栽培，佢話：「早幾年發生好多事，好大嘅挑戰，多次想過放棄，多謝身邊朋友支持，前輩同我傾偈。」佢仲喺台上謝謝太太：「要同太太講聲I Love You，佢喺身邊提點同支持，我個女、父母，仲有兄弟山聰、卓羲同林峯。」

精選娛聞，喺晒《娛果》
http://fb.com/appledailyent