自由行令到零售業重出生天，但商場供應多，大業主想收多啲租，都要付出唔少努力至得。
舊年大搞活動嘅屯門市廣場，信和陳欽玲話，舊年十二月，租金收入比一年前多一成半。佢透露，從顧客問卷調查得知，消費者想要多啲唔同品牌嘅時裝、化妝品同食肆，所以就算商場已經搞得幾好，都會繼續引進呢類租戶。
今個農曆年與情人節，信和動用二百萬，為屯門市廣場添新裝，吸引消費者，好似年初四，請嚟風水師麥玲玲講雞年運程。
商場平日人流二十一萬，假日二十七萬，陳欽玲預計，農曆年期間，會有一成增幅，商戶生意會多一兩成。客戶平均消費五百至一千，商場以底租加分成計租，所以估計信和收入增兩成。

九叔標售商場
裕泰興「九叔」家族，舊年跑出，成為最活躍投資者，入市出市一樣積極，除咗散舖善價而沽，最近又標售全幢商場。九叔或有關人士，委託韋堅信，標售銅鑼灣景隆街顯輝中心，意向價億五。據講，有投資者畀到億二、三。呢幢銀座式商場十五層高，九叔等由收舊樓到重建，一手一腳搞掂，九七年落成，全幢一萬呎有多都租晒，月收四十萬，以億五計，回報三厘二。
九叔家族精於投資旺舖，去年以億二天價，將景隆街二號舖王售予黎永滔，呎價十二萬六。
裕泰興早輪標售上環酒店地皮，遇上附近有同類地皮標售而押後，預計九叔過埋年，先至再定截標日期。