崔碧珈（Anita）過去一年飛不停，日前現身法國時裝周嘅佢，前日終於返香港，Anita接受《蘋果》訪問就話，今次去法國除咗參與時裝周，支持法國設計師老友Christophe Guillarme，仲係為咗嚟緊一部法國電影做前期工作。

Anita去年年初，約滿舊公司回復自由身後，一直努力開拓事業同增值自己，特登飛埋去英國修讀電影課程，增值自己。問佢收起導彈胸，係咪想轉型做才女，向幕後發展？佢即好緊張咁話：「我仲做幕前ｏ架！不過因為一直都好鍾意電影幕後工作，同導演Charles Guérin Surville之前喺康城認識，佢最初只揾我演呢部電影，但自己睇咗劇本好有興趣參與幕後，大家一拍即合，最後我參與埋監製部份，希望將部電影帶埋嚟亞洲。」

早前Anita因為工作太忙令抵抗力變差，在德國肚皮刮傷的小傷口，竟變成嚴重細菌感染，最終要入醫院做手術，問佢怕唔怕體力未能應付繁忙工作？Anita就笑住話：「嗰次係意外啫，以後都會錫住自己多啲，因為知道要博殺，電影明年初開機，到時都要飛法國同意大利拍，唔可以病！」

講番過去一星嘅嘅行程，Anita話可以用超級忙碌嚟形容，不過亦覺得好充實，佢話：「每日都係瞓幾個鐘，因為要開好多會同埋去睇景，加上又答應咗一啲媒體同品牌影相，所以每日嘅行程都係排滿晒，不過因為咁啱一個英國model朋友，同埋一個英國嘅PR朋友都飛咗去嗰邊做嘢，每晚收工大家約埋一齊食飯，傾偈聚舊都好開心。」

Anita又透露：「其實半年前開始，幾乎每一個月都飛歐洲，好似以前喺英國讀書，都會成日去法國玩，但做嘢就第一次，之前已經開始學法文，因為電影除咗英文，都要講少少法文，我對呢個語言都好有興趣，希望可以學好啲，咁對之後工作都好有幫助。」

精選娛聞，喺晒《娛果》
http://fb.com/appledailyent