韓國女星孫藝珍近期影視都有新作見街，其夥拍型男蘇志燮主演嘅新片《現在很想見你》(韓版《藉著雨點說愛你》)大前日喺韓國公映就有好成績，據韓國電影振興委員會今日公開嘅數據，噚日共有逾12萬人次入場觀看《現在很想見你》，令電影連續3日成為單日票房冠軍，累積入場人數已超過32萬，相當厲害。

另外，孫藝珍與韓劇《機智牢房生活》男星丁海寅合作嘅JTBC新劇《經常請吃飯的漂亮姐姐》將於本月30號首播，劇組噚晚公開第3個預告片谷劇。今次預告片中，孫藝珍及丁海寅喺雨中擔一把遮，丁海寅驚孫藝珍淋濕，除咗將遮偏向孫藝珍嘅方向外，又攬實孫藝珍，仲約孫藝珍去睇戲，好不甜蜜，而今次嘅預告令劇迷諗返起首個預告，當時丁海寅想攬住孫藝珍卻唔夠膽，唔知今次預告係咪暗示兩人關係有大躍進？

更多韓流，喺晒《娛果》
http://fb.com/appledailyent