新民黨立法會議員容海恩同該黨政策總裁袁彌昌上月奉子成婚，新婚燕爾之際竟然傳出袁彌昌已經離開新民黨！唔通袁因為入黨溝女將被革走？非也，葉太同八方講袁彌昌只係「內部調職」去匯賢智庫，認為佢喺智庫可以令佢研究工作上有更大發揮咁話。至於袁彌昌就話，係因為避免角色衝突，所以走去智庫遠離愛妻咁話。

政圈近日傳出袁彌昌本月初已經向新民黨辭職，唔再做政策總裁，有人就懷疑係唔係同佢入黨之後溝咗恩恩豬，仲要奉子成婚有關。八方問過新民黨話事人葉太，葉太就澄清袁彌昌係「調職」唔係離職，佢會轉去匯賢智庫做政策顧問，主要負責政策研究工作。被問到係唔係唔畀袁彌昌同恩恩豬同一個地方工作太痴纏，葉太梗係否認，反而係覺得智庫可以令佢研究工作上有更大發揮咁話。

袁彌昌就同八方坦白承認，轉去匯賢智庫係因為恩恩豬。佢話之前做新民黨政策總裁，好多決定都同立法會工作有關，為咗避免有人話佢「公私不分、偏幫恩恩」，佢就自願轉去匯賢智庫工作，未來主要負責做大灣區、青年同教育研究，其他嘢都會少理，減少角色衝突。

袁彌昌一直都唔係新民黨員，被問到婚後會唔會入黨，佢笑指：「Eunice（容海恩）都做咗喇，我做唔做都一樣。」被問到恩恩豬想2020年立會選舉爭取連任，袁彌昌即刻表示支持，又話女人要有自己事業，而佢亦好樂於做恩恩豬背後嘅男人咁話，認真Sweet Sweet喇。