由1990起的《娛樂圈血肉史》計起，黃子華在28年間，演出超過200場棟篤笑，到今年《金盆o浪口》宣佈收咪，正式告別棟篤笑舞台。黃子華在頭場結束前，哽咽唱出一段粵曲：「勞碌半生忙打拼，想喺太平盛世，做個小明星。」道出多年心聲。而這次棟篤笑搶飛情況非常嚴重，黃子華公開呼籲政府研究對策，最終回應訴求檢討現行條例。

黃秋生上年貼相尋找失散52年生父未果，今年接受BBC（英國廣播公司）訪問，令事件再受關注。結果有網民找到一張秋生生父的澳洲入境證，最終聯絡到兩位同父異母的哥哥David同John，而父親已在88年離世。到6月底秋生直認有一位20歲私生子，又稱兩父子關係良好，亦會見面。可惜的是，秋生今年多次面對家庭變遷，其母因病與世長辭，秋生未能見母親最後一面。

卓林今年4月被發現與女友Andi身處加拿大流浪，之後拍片尋父，又透露兩人無家可歸，並稱患上創傷後壓力症。隨後兩人在多倫多成立多媒體創作公司，本以為會「落地生根」，但到11月底，有人發現卓林與Andi在銅鑼灣拍拖，才得悉兩人低調返港，同一時間，兩人在ig宣佈已婚。不過卓林被指欠交租住的賓館租金，最後由母親吳綺莉擺平，卓林與Andi回到吳綺莉大坑寓所居住，數日後，吳綺莉於活動中表示卓林與Andi搬走，但未有透露落腳地。

香港人離不開電視撈飯，但一直情傾無綫，一台獨大情況從未改變。今年世界盃ViuTV免費直播多場賽事，風頭終於蓋過無綫。最終世界盃決賽日，ViuTV平均收視有24.4點（約174萬人次），同時段無綫播出古天樂舊劇《刑事偵緝檔案IV》，平均收視只得2點。呢次世界盃ViuTV邀請到曾志偉作決賽直播節目嘉賓，之後志偉被無綫冰封，有傳無綫因此拒絕志偉做港姐司儀，直到12月《東華》才破冰。

而無綫雖然力挽狂瀾，但今年中承認因轉型而要裁減人手，先係TVBI派了60封大信封，之後解散16廠，盛傳約150人被裁。至於80年首播的《體育世界》、97年創刊的《TVB周刊》及有26年歷史的婦女節目《都市閒情》，遭遇各有不同，《體育世界》停播、《TVB周刊》轉型為網上版、而《都市閒情》就改作廣告雜誌式節目。

另邊廂，亞視熄機一年幾，今年一月借手機app及網上平台翻生，仲復辦亞姐，決賽喺馬六甲進行，看似銀彈不絕，但年中時亞視為節流，先係裁減30人，再到原本任職亞視CEO嘅吳雨、任職營運總監嘅區偉林齊齊轉做顧問。而有線電視就喺8月將娛樂組摺埋，只留底一個人手，而奇妙電視就改名做香港開電視。

曾經高調講過好愛吳千語嘅林峯，由婚訊變分訊，今年3月林峯被發現獲父母安排相睇，新女友係模特兒張馨月。分手未必放得低，陳家樂曾陪余香凝經歷過車禍意外，以為能同甘共苦，但6月余香凝被指劈腿，無奈分手。回復單身後嘅陳家樂，被指成為洪卓立與湯怡感情中嘅第三者，立立11月宣佈與拍拖11年分手，立立於活動上受訪時爆喊，亦有為陳家樂辯解，強調三人關係都係好朋友。近年屢傳婚變嘅劉愷威同楊冪，就選擇於冬至發離婚聲明，兩人表示會以家人身份共同撫養女兒小糯米。

洪朝豐上年10月確診患舌癌，接受切脷手術及電療後，走出谷底，今年受訪時，洪朝豐感激前妻風雨同路。同樣互相支撐渡過難關的有黃日華梁潔華，梁潔華13年患上俗稱血癌的「急性骨髓性白血病」，近年病情穩定，但今年底傳復發，黃日華幾乎全面停工照顧，而囡囡黃芷晴就代父母表示，母親只是進行骨髓移植手術，要在家休息。