跑步時男士赤膊上身、女士只著Sports Bra,係咪好養眼、好無拘無束呢?費清講緊嘅係首次喺香港搞嘅Chubb YOLO Run HK 2017,之前喺新加坡已經舉辦咗兩屆,鼓勵參加者脫去束縛,釋放自我,無論係排骨身型,定擁有一個大肚腩,都唔洗介懷,希望參加者可以「大解脫」,唔好理其他人想法,齊齊跑出正能量,仲可以做善事。
YOLO Run嘅YOLO,意思係you only live once,即係活在當下。跑步活動會係10月1日香港科技園舉行,比賽時間由上午8時至中午12時,分為5公里及10公里賽事,只有10公里屬於競賽,而所有參加者完成賽事後仲可以參加大型瑜珈班放鬆一下。每位赤裸上身嘅男參賽者,以及只著Sports Bra嘅女參賽者,主辦單位都會捐出$20比國際培幼會(香港)作慈善用途。