睇賽期表，今個月賽事其實算精彩，本月頭已跑G3百週年紀念銀瓶，到初三賀歲馬，同日設賀年盃一班賽及4歲系列次關香港經典盃。

到本月尾25日，同日進行兩場國際一級賽香港金盃2000米、1400米女皇銀禧紀念盃，本港頂尖佳駟相信會紛紛亮相。

女皇銀禧紀念盃一場，已有消息指容天鵬馬房大灰獸「平湖之星」，梁家俊會揀騎上陣，其另一嫡系座騎「美麗傳承」（大摩馬房）亦會以此仗為目標，將重配潘頓。

至於三冠大賽次關香港金盃，已在頭關董事盃先下一城的「四季旺」（沈集成馬房），繼上季打吡得殿軍之後，將再向2000米進軍，首次參戰香港金盃，據知是由雷神莫雷拉建議。

雖然「四季旺」一向以1600米最為首本，但5歲馬踏大熟期，長力應漸養成，加上同程2000米亦有經驗，相反女皇銀禧紀念盃一組強手林立，棄1400米而扳長出擊，應屬明智之舉。