近日天氣非常之咁熱，咁熱做咩好？出海船P絕對係明智嘅選擇！今日就有周刊報道，直擊大台嘅一眾港姐同奀星陪富二代船P。

富二代船P就梗係非同小可，六艘遊艇排排泊喺海中心。今次有邊啲富二代？報道就話有清洪契仔巫翊鳴、前立法會議員楊孝華大仔楊哲寧、李彩華前男友潘啟翀、告東尼阿仔告祟恩等等。港姐同女星方面呢就有：莊思明、莊思華、彭慧中、前港姐季軍何艷娟、派對動物王秀琳同大批三點式索女。

報道中仲話今次係由巫翊鳴負責請靚女們上船，佢都玩得好開心o添，仲同契妹莊思明玩得好投入。莊思明雖然啱啱先宣佈同楊明拍拖，不過同契哥一啲都冇避忌，周刊影到巫翊鳴從後攬住契妹，之後仲有另一個女仔同樣從後攬住巫翊鳴，好close，感情好pure，但都有啲似人肉三文治。而莊思明家姐莊思華就全程陪喺男友告祟恩身邊，成個船P到傍晚先結束上岸。

致電莊思明問番嗰日喺船上玩得開唔開心？佢就話留番聽日出席活動先至一次過回應喎。