日本女星天海祐希主演嘅朝日台劇集《緊急取調室2》日前播出嘅結局錄得14.4%收視，平均收視錄得14.1%，屬今季人氣最勁嘅劇集，有傳電視台更計劃開拍第3季，有傳天海祐希見劇集成績咁好，希望與日劇女王米倉涼子睇齊，唔單止要求侍遇一樣，更要加片酬。

米倉涼子主演嘅《Doctor-X》同屬朝日台人氣劇，去年播出第四季，仍然收視強勁，有指佢拍劇每集酬勞高達500萬日圓（約35萬港元）。報道話天海祐希見今次劇集收得，似乎視米倉涼子為假想敵，要求下次與演力派演員合作，亦希望每集要有嘉賓加盟谷收視，最重要就係加片酬，據知情人士透露天海祐希上一部劇集《Chef～三星級營養午餐～》收視仆值，今集拍《緊急取調室2》嘅酬勞跌到150萬日圓（約10.5萬港元），要求加片酬都合理，不過有電視人員擔心今次滿足咗天海祐希，下次米倉涼子可能會提出無理要求，兩個阿姐鬥法，電視台方面唔知點應付好。