八方唔係認叻，不過前兩日爆料話白龍王預測股壇有凶兆後，大陸股市就冧到癲，創咗10年來最勁嘅跌幅，仲拖冧埋環球股市，呢啲唔知係咪叫開口中。雖然八方唔係好信邪，但見到股災都有啲心寒，唔怪得咁多官商明星，山長水遠都要飛去泰國搵白龍王指點迷津啦。
因打壓《秋天的童話》搞到犯眾憎嘅廣管局主席馮華健，原來都好呢味嘢，上個禮拜日俾八方啲老友昅到佢着晒白衫白褲去見白龍王。馮華健近排俾人鬧到暈，拜訪白龍王沾番啲靈氣，博轉運都好正常。
白龍只喺星期五、六、日接見善信，每次只見100人，佢咁多fans，要見佢老人家，就要晨早3、4點去排隊攞籌。馮華健有頭有面，梗係唔使排餐懵啦。八方老友透露，佢係獲東亞娛樂老闆林建岳一位親戚引見，所以只係等咗一陣，好快就有得「打尖」見白龍王。
權貴就有呢亭好處，廣管局掌管審查電視、電影生殺大權，難怪岳少都要畀面啦。八方老友仲話，馮華健同白龍王見面時好多嘢講，講到興起手舞足蹈好鬼大動作㖭。其實如果馮華健唔想俾人鬧，應該多啲聽市民意見，使乜求神問卜吖！