最近大煲特煲外國電視劇，通常睇電視劇會先讓三招，即係先有理冇理連睇三集，如果劇情引人入勝當然連續追看，但如果頭三集都無甚看頭的話，該劇立即被打入冷宮，在碟櫃中鬱鬱而終。
繼《Friends》、《SexandtheCity》、《WestWing》、《ER》、《Sopranos》、《DesperateHousewives》後，《Lost》是近來的風頭躉，連奪幾項大獎，收視亦高企，《Lost》集《Survivor》式Realityshow的刺激與懸疑連續劇的追看慣性於一身，故事講述一架民航客機墜落於某不知名小島上，生還者每人一個小故事，各為生存爾虞我詐，講講吓小島上的故事便Flashback到某人的前半生，雖然有少許打「拉布戰」之嫌，但勝在小島上的謎團夠多，角色的刻劃及演員演出得出色，所以幾乎連續三日便煲完一整季，在免費電視劇集中可以講得非常算係咁。

睇幕後花絮更有趣，原來該劇的製作模式非常「港產片」，ABC公司只看過製作人幾頁紙的劇情梗概便決定開拍，一邊買一架舊飛機拆散運至夏威夷一邊寫劇本，一邊試鏡見演員，見到邊個啱心水便為其度身訂做劇情放入故事中，算得上係一項非常大膽的投資。
唯一不滿係劇中幾個大「謎」在最後一集中仍未有解答，要留待第二季才知分曉，不像《DesperateHousewives》在第一季已圓滿了結了大部份劇情。不滿還不滿，仍心焦地等候第二季的來臨，不過製作人最好醒醒定定，否則如果等咁耐得個大頭佛，到時柴台都柴到你失魂。