韓國人氣綜藝節目《Running Man》（RM）去年加入兩位新成員全昭旻及楊世燦，八位成員今晚首次喺台灣南港展覽館舉行見面會，吸引7,000人捧場，進賬2,200萬元台幣（約557萬港元），雖較去年少千人進場，但仍係台灣今年最賺錢嘅見面會。

劉在錫、池錫辰、宋智孝、李光洙、金鐘國、HaHa、全昭旻及楊世燦今晚7時30分現身，成員一開場先合唱一首抒情歌，全員再講中文「大家好」打招呼，李光洙話希望跟大家度過快樂嘅時光。智孝亦表示：「好耐冇見，好想念大家。」去年缺席台灣見面會嘅劉在錫笑言，冇諗到今日有咁多人嚟睇佢哋，又大嘆每次去台灣都來去匆匆，希望下次可以去景點。

金鐘國就透露噚日有去健身，HaHa表示：「令金鐘國除衫係我嘅強項！」引來粉絲尖叫。HaHa表示是次特別準備咗雷鬼曲風嘅新歌。智孝談到明年計劃時，表示會努力喺《RM》演出，亦會嘗試各種唔同嘅表演。

李光洙話自己因為行程關係所以自己一個來台，談到噚日楊世燦透露光洙都要一齊食臭豆腐嘅約定，光洙就對楊世燦表示：「我幾時傳訊息畀你，話要食啊？」非常搞笑。

精選韓流，喺晒《娛果》
http://fb.com/appledailyent