佩魯賈今屆唔知搞乜鬼，喺意甲聯真係輸到人怕，佢哋雖然喺一月轉會市場重開後羅致由英格蘭回流嘅「白頭前鋒」拉雲拿利，同保夫萊特組成「雙英」前鋒組合；上周六聯賽對錫耶納另一「英超人」費奧，拉雲拿利重先開紀錄㖭；點知佩魯賈喺最後三分鐘連失兩球，始終無法打開今屆聯賽勝利之門，睇嚟踏入猴年依然無法轉運。
對於球隊今屆嘅表現，佩魯賈教練哥斯美喺賽後亦都𢱑晒頭，佢重話：「我覺得我哋佩魯賈今季簡直受咗詛咒！坦白講，我有不祥預感！」既然佩魯賈咁運滯，我求大俠就奉勸各位想追佢哋「反底」嘅球迷睇定啲，等到佢哋喺聯賽開咗齋之後再作打算都未遲。

斯卡伯勒早失波
肥仔門將冇得歎世界
非聯賽隊斯卡伯勒喺上周六英格蘭足總盃鬥「億萬大軍」車仔只輸○比一，都算係咁。不過，最唔抵嘅係佢嘅肥仔龍門獲加。事緣贊助斯卡伯勒嘅英國《太陽報》賽前話只要獲加喺比賽頭十五分鐘唔失波，就可以喺倫敦一間三星級酒店度周末，但佢偏偏喺十分鐘就失波，真唔抵！