英格蘭一代鐵衛阿當斯近期喺英國《太陽報》連載自傳《Sober》，日前批評領隊雲格唔識訓練防守，球會上下仲要4次請佢「食檸檬」，唔理佢自薦回巢做教練。雲格周五賽前記招亦有回應阿當斯嘅批評：「阿當斯而家可以展現佢嘅能力。我同佢識咗好耐，所以的確幾唔開心……但我覺得呢件事唔重要，寧願花時間喺更有趣嘅事情。」

又難怪雲格「膠到費事畀」，皆因50歲嘅阿當斯上月中「空降」接過西甲球隊CF格蘭納達帥印幫手救火，結果火就救唔到，球迷就睇到把幾火，計埋周五煞科日主場輸畀愛斯賓奴1:2，上任後7戰全敗兼包尾降班收場，佢賽後都難掩尷尬：「今個球季實在係災難，我哋一定唔可以重複犯錯。球隊最大錯誤係收購貨不對辦，但我哋有長遠計劃。」