麥貝夷喺fb分享搭八折的遇上司機讚靚女，自覺被對方性騷擾，但就被網民分享於討論區恥笑佢小題大造，今日麥貝夷親身講返成件事嘅經過，但係究竟的士司機呢番言行有冇構成性騷擾？記者致電大律師陸偉雄了解，佢認為要視乎實際情況：「要視乎司機當日嘅面容、動作會唔會好猥瑣，但單憑一句『靚女』唔足以構成性騷擾。」陸續稱亦要視乎女方當日嘅精神狀況，譬如有冇飲酒或極度疲倦：「因為咁樣對事物理解能力亦可能減低，誤會機會亦大咗。」

相反，麥貝夷於fb公開暗示對方是「狗公」、「長時間用下體諗嘢」，又會否構成誹謗？陸偉雄稱「狗公」一詞已是指控，該的士司機甚至有權向佢反索償。陸認為麥貝夷若想尋求法律協助，應事先向律師徵求意見，了解勝算後先作出行動，以免「偷雞唔到蝕渣米」被反索償。