【鳩嗚乜乜乜】
講起我就扯火嘞，我家姐（利申：費清唔係姓關，佢亦都唔係關家姐），一路都喺西貢清水灣半島嘅五塊田度住，嗰度有個隱世小海灘，啲有錢人同名人得閒食飽飯冇嘢做就揸車揸遊艇嚟玩。住咗咁多年，我家姐同佢班friend已經係當咗個海灘係私人浴場，最近仲有人自告奮勇，喺石灘位置修建咗條扶手梯，方便潛水人士上水落水，呢個秘境一直好少人知。

#吸引市民Selfie

呢堂梯造價幾錢我唔知，只知道一定平過屏山單車泊位嗰條鐵。好可惜，好嘢真係冚唔住嘅，就好似漆黑中嘅螢火蟲一樣，連梯嘅私人浴場好快就俾外人發現，仲有人影相放咗上facebook。
好快趣，估計就會有好多市區人湧入嚟打卡，爭住同條梯Selfie，配埋啲咩「捕獲野生扶手」嗰啲爛gag，然後政府基於公眾安全介入，拆走條梯……小棕林從此多事。
或者會有環保人質疑，個海灘係官地，嗰度又鄰近世界地質公園範圍，種條鐵落啲岩石度，唔係幾好，會破壞自然環境。之但係當區居民兼環保人司馬文就好欣賞呢件作品，佢過去都一直爭取喺度起個小碼頭。佢話呢啲好嘢根本應該由政府自己做，鼓勵港人游多啲海泳，就好似西環泳棚咁，政府千祈唔好拆呀！

費清
＃要生計，也要生活 ＃毋忘初衷